الديــن وَحــدُه مش مِقيـاس
مش مِقيـاس لثقافـة النـاس
ولا حتى لإيمـــــــان النـاس
الديـــن... بيعَلــِّـم الأخـــلاق
والأخـلاق... هِيـَّا المِقيــاس
ياما ناس هايجة بإسم الدين
بلســانـهم.. وبالسكاكيـن
وبيقطـَّـعوا لحـوم النـاس
***
ابني كنايـس وابني جـوامـع
واملا بيهم مُـــدُن وشـوارع
واملا الدنيــــا خُطـب دينيـة
لو مش بتعلـِّـم الأخـلاق
ولا بتعَلـِّـم إنسـانيـة
قبل صيـام وقبل صــلاه
ما يبقـاش فيها مكـان للــــه
***
لو أتهَـوِّد أو أتنَصَّـر
أو أتأسْـلِـم
واتعمَّـق في الديــن واتكلــِّم
وادخل في الأديان في سِباق
وانا مافيـش عنـدى أخــلاق
يبقى إيمـاني نِفــاق وريــاء
***
مَثَـلْ.. النـاس الحُكَـما قالـوه
عمـري ما يــوم أبـداً أنسـاه
اللي مالوش خيـر في أخـوه
إزاي حيكون له خير في الله
******
مهندس عزمي إبراهيم
0 comments:
إرسال تعليق