إلى روح الصديق جورج خزامي/ جورج منصور
وكل الدني ما يضل فيها شي حلو
يلقي خبر موتك على كتاف الجبال
يا بيركعو عا الارض يمّا بيزحلو
بهالجاليه لما بيجو يعدّو الرجال
صف الرجوله بيحسبوك بأولو
يعدّو معي بها الجاليه الربّو عيال
وإنت يل ربّيت جيل بكاملو
بأرض غربه عليك ما ضاق المجال
ياما بشر لولاك كانو تشنطلو
الغياب عرفو جورج أرزه من الشمال
بفيّاتها كانو يجو ويتظللو
كنت تهوى الشعر وتحب الجمال
يعني جمال الروح هل ما منجهلو
ما جيت قلك شعر من نسج الخيال
جيت الحقيقه للخليقه قولها
وإحني عا نعشك وبدموعي بللو.
نيّال هل متلك عا حب الله عاش
يبني بإيمانو براج تهدّمو
ما عاش بالوحده ولا بالانكماش
ولا قدرت ظروف الليالي تصدمو
يا جورج عندك ناس منفوشه الرياش
بالمجتمع لا أخّرو ولا قدّمو
إنت الخدمت الناس لكن عا بلاش
الواجب عليهم يخدمو ما بيخدمو.
شو ما انطلب منك بروح الطيّبه
ترد الجواب عا السائل بكلمة نعم
كنت انتي والحياة مغالبه
ما بينغلب هلي برضى الله اندعم
مضياف كنت وطلتك طلة أبي
وهَطْلت عليك من السما كل النعم
انعجْنت بقلبك كل لقمه طيبه
الما بيطعم من القلب ما بعدّو طعم.
يا أهل جورج اليوم عا جورج الأمان
انفرشت طريقو بالبساط المخملي
وسّعولو بالسما أحلى مكان
وعامل مضافه بحضرة الرب العلي
تبسم بوجه الداء وتصبّر كمان
وتا نساعدو كانت ايدينا مكبّله
لو كان عندو الموت ذرة عنفوان
عا الآدمي ممنوع يعمل بو علي.
ان كان يا "عاصون" بدّك للحقيق
متل ما جرحك غميق جرحي غميق
"عاصون" أو "متريت" هودي ضيعتين
وفرد ضيعه انكان في لبنان ضيق
"جورج" كان يفلش علينا الجانحين
الضيعه العريقه بحضنها ربّت عريق
اليوم الخساره قاسمينا عا التنين
إنتي خسرتي ابن وخسرنا صديق.
