الخرفان يمتنعون/ الدكتور ماهر حبيب

بالنسبة للى معترضين على ترشيح مزدوجى الجنسية للبرلمان بأقول لهم ياريت يكون كل النواب مزدوجى الجنسية لعدة أسباب

أولا المصرى إللى عايش فى الخارج غالبا بيكون وطنى بجد فبرغم إنه خرج يبحث عن حياة أفضل من الغلب إللى شافه إلا أنه بيكون مرتبط عاطفيا ووطنيا ووجدانيا بالوطن أكثر من إللى متشعلق فى الإتوبيس وطلعان عينه وعمال يتذمر على العيش والعيشة وإللى عايشينها وما يعرفش قيمة الوطن غير إللى نفسه يرجع تانى لحضن بلده مصر

ثانيا المصرى إللى عايش بالخارج ممكن يقدم أفكار من خارج الصندوق ويعطى أفكارا من وحى الحياة والنظام الذى يراه فى الخارج ولا يتواجد فى مصر مثلها ويحاول تطبيق أشياء لا يعرفها إلا من عاش فى الخارج فعلى سبيل المثال هناك إختراعات لم تظهر فى مصر حتى الأن وهناك حوالى 100% من الشعب المصرى الذى لم يسافر إلى الخارج لا يعرف عنها شيئا ولا يعرف كيف يستخدمها مثل إشارات المرور أو الإلتزام العفوى بالطابور و على العكس يجهل مزدوجى الجنسية الإختراع المصرى الصميم والذى لا يوجد إلا فى مصر وهو إختراع إنت عارف إنت بتكلم مين؟ وكذلك وتفتيح المخ وخرم التعريفة أو دهان الهوا بالدوكو

ثالثا المصرى المزدوج الجنسية يعرف معنى قبول الأخر ويقبله وبالتالى أفكاره ستكون فى نفس الإطار وكلنا عارفين أن الإناء بينضح بما فيه

رابعا المصرى مزدوج الجنسية مش حا يهمه حد ويمتلك حرية غير مسبوقة ويوم ما تضيق به الحال حا يرجع مكانه ويادار مادخلك شر فلذلك سيكون أكثر جرأة وأكثر تحررا فكريا وسياسيا

خامسا المصرى مزدوج الجنسية غالبا بيقبض من شغله بالعملة الصعبة يعنى عينه مليانه لا حا يبص  على مكافأة أو بيشتغل فى تهريب المخدرات وبالتالى سيكون أكثر غنى من كثيرين يريدون أن يدخلوا البرلمان طمعا فى الحصانة وبعدها يهلبوا من تحت لتحت

طبعا أنا أتكلم عن مزدوجى الجنسية ومجبتش سيرة الخرفان لأن بالطبع ما ينفعش إن خروف مهما كان جنسيته أسترالى صومالى تركى هندى بنجلاديشى أو أفغانى ينفع يخش البرلمان علشان كلنا عارفين إن فصيلة الخرفان دى مش فصيلة بنى أدمين وطبعا مش معقول حا نقبل إن البرلمان بتاعنا يخشه خرفان محلى أو مستورد طازج مبرد أو مجمد فالخرفان لا تتواجد غير فى الحظيرة أو عند الجزار أو مشوية على الفحم أو على الشواية أو مطبوخة مع شوية ملوخية وحتى الكوسة ما ينفعش تتاكل معاها

عرفتوا بقى فوايد مزدوجى الجنسية

الخرفان يمتنعون