ناموسيتك كحلى يا مرسى/ د. ماهر حبيب

ممكن حد يصحى مرسى من النوم ويقول له البلد خربت

ممكن حد يصحى مرسى من النوم ويقول له وزير العدل بيبعت للشورى مشروع يقنن الميليشيات الإخونجية بدعوى إنشاء شركات حراسة خاصة بعيدا عن الشرطة وحراسات خاصة إخوانجية لنقل أموال الإخوان من المنيل للمقطم

ممكن حد يصحى مرسى ويقول له الجماعة الإسلامية حا تتولى الأمن فى أسيوط يعنى ميليشيا الجماعة حا تستفرد بمدن الصعيد واحدة واحدة ونلغى الشرطة من البلد

ممكن حد يصحى مرسى ويقول له فيه مدينة إسمها بورسعيد بقالها 6 أسابيع الشرطة بتقتل مواطنيها وأولادها حا يروحوا فى الرجلين وإعدام 21 واحد غير كمالة الحكم علشان تهدوا ألتراس الأهلى ولسه ناس تانية حا تموت بعد الحكم السياسي فى قضية بورسعيد

ممكن حد يصحى مرسى ويقول له عملت أيه مع رئيس وزراء ليبيا فى قضية الأقباط إللى إتسحلوا فى ليبيا والا دول مش من رعاياك يا مولاى

ممكن حد يصحى مرسى ويقول له عملت أيه فى المنصورة والمحلة والا إنت ساكت لغاية ما النار الوالعة تاكل بعضها وتخمد ما أصل إنت بتحلم

ممكن حد يصحى مرسى ويقول له عملت أيه فى قرارات الشاطر الخايبة بتصفية عائلة ساويرس والبورصة إللى ضاعت بسبب قرارت قنديل المقندلة

ممكن حد يصحى مرسى ويقول له عملت أيه فى الإقتصاد وإحنا على وشك الإفلاس بسبب حكمة سعادتك وخيبة أمل وزارتك وقلة حيلة قنديلك وقصر نظر حكمك

ممكن حد يصحى مرسى ويقول له عملت أيه فى إللى قتلوا السواح وحطوا سولار مطرح الهيليوم وخلى السياح حتة فحمة فى ثوانى

ممكن حد يصحى مرسى ويقول له شلتوا كبير أطباء الطب الشرعى إحسان كميل جورجى علشان أيه ؟علشان قبطى وألا علشان إبتدى بفضحكوا لما صرح بحقيقة قتل السياح والثوار

ممكن حد يصحى مرسى ويقول له بتعمل أيه فى عيشتك غير إنك يوم الجمعة لما الناس تكون واخده أجازة تنزل تصلى الجمعة وتبطل شغل باقى الأسبوع ما إحنا ما بنشوفش طلعتك البهية ونشوفك صاحى من النوم غير وإنت جارر وراك جيش جرار من حراسك ومعاك قنديلك ووزارته المقندلة

ممكن حد يصحى مرسى وقول له إنت فاهم غلط ...الناس بتطالب لقمة عيش لكل مواطن وإنت فاكرها خرطوش فى عين كل مواطن

ممكن حد يصحى مرسى ويقول له إنت سايب الشرطة والناس بيضربوا بعض.. الناس حا تقطع الشرطة والشرطة حا تسيبها لك مخضرة  وتشرب من نفس الكاس لما كسعمتوا الشرطة يوم 28 يناير وهربت إنت من السجن علشان يبقى عندنا رئيس من أصحاب السوابق

ممكن حد يصحى مرسى و يقول له يقول للعريان ممكن تقعد نص ساعة ما تتكلمش ع البرلمان يا عبده مشتاق

ممكن حد يصحى مرسى من النوم ويقول له صباحية مباركة يا ريس بقالك 9 شهور رئيس والبلد حا يجيلها إجهاض ويموت الجنين والأم فطيس علشان ننقذ التومرجى وناموسيتك كحلى يا مرسى