مرسى غاضبا: قنديل هاتولى قنديل
قنديل مهرولا : أيوه ياريس خير ألهم إجعله خير
مرسى : حا ييجى منين الخير وإنت من ساعة ما مسكت الوزارة والدنيا إتقندلت بستين نيلة
قنديل : معلش ياريس إنت عارف إن خبرتى قليلة وإنت لما إختارتنى كنت عارف إن الحاجة الوحيدة إللى بفهم فيها هى إزاى أغرق مصر هو أنا مش كنت وزير الرى
مرسى : عارف يا سيدى بس كان عشمى تكون أنصح من كده
قنديل: أوامرك يا ريس
مرسىى: فلوس عاوز فلوس من تحت الأرض البلد فلست وإحنا بنقاوح والحكاية لو كملت شهرين من غير ما تشوف لى فلوس الناس حا تولع فينا حتى بتوع الإخوان والسلفيين
قنديل: اجيب لك وزير المالية تتصرف معاه
مرسى : وإنت بتهبب أيه هما مش بيقولوا لك على كل حاجة
قنديل: ما هو يا ريس كل مشروع نبتديه بيطلع على فاشوش
مرسى: يعنى عملتوا أيه
قنديل: الوزير قال حا نطالب إسرائيل ب 480 مليار دولار بدل البترول بتاع سينا
مرسى : بالذمة إنت عندك مخ يعنى هما حا يدفعوا لنا المبلغ ده علشان سواد عيون سعادتك وبعدين التخريف ده تضحك بيه ع الغلابة لكن الكلام ده حا يودينا فى ستين داهية وتزعل صديقى العزيز بيريز وخلى بالك ما تزعلش إسرائيل مننا ده إحنا ما صدقنا حماس إتزقت عليهم وأنا تدخلت وبقيت فرخة بكشك عند حسين بركة أبو عمامة
قنديل: طب قلنا نتصالح مع حسين سالم وطلبنا منه 20 مليار جنية
مرسى : إنت بتستعبط بقى الراجل علشان يتصالح معاك وهو قاعد فى أسبانيا وحاطط رجل على رجل تشترط عليه يدفع مبلغ قد إللى طالبينه من البنك الدولى ومطلع عنينا بيه تقوم تفتكر إن فيه عاقل حا يدفع لك المبلغ ده علشان يرجع يعيش جنبى فى التجمع
قنديل: ما هو العيشة جنبك تسوى مليارات
مرسى : بطل إستظراف وخلينا فى الجد
قنديل: ما هو إقترحنا على وزير السياحة يأجر أبو الهول والهرم أهو نخلص من ذنبهم وتبقى فلوس السياحة رايحة قطر وما تخشش جيبنا وناخد فلوس قطر الحلال علشان عيشتنا تبقى حلال فى حلال بس منهم لله إللى كشفوا السر وبقت فضيحتنا بجلاجل
مرسى : ما هو إنت مش فالحين غير فى البعبعبة إشتغلوا كوتيمى وإنتوا شغلكم ينجح يعنى لو ما كناش بنشاغل أمريكا كوتيمى مش كان مبارك فقس الملعوب وزمانى أنا والشاطر بنسيق لومان طرة لغاية دلوقتى
قنديل: عنك حق يا ريس
مرسى : طب عملتوا أيه تانى
قنديل: ما إنت عارف ياريس إن الجيش حرن وورانا العين الحمرا فى موضوع بيع القناة لقطر
مرسى : أنا بصراحة مكسوف من الشيخ حمد مش عارف أديله حتة من مصر ده الراجل مغرقنا بخيره ولازم نرد له الجميل ولو على أدى له عيل من عيالى
قنديل: بلاش الننوس الصغير ده كفاية مشاكله مع البوليس
مرسى : ما أنا مش عارف ألاقيها منين والا منين
قنديل: بس أنا إفتكست لك إفتكاسة إللى هى أنا قلت الناس مش طايقة إسم ساويرس فقلت ندبسهم فى مبلغ 16 مليار جنية لو دفعوا أهو نفك زنقتنا شوية ولو ما دفعوش أهم مش حا يعتبوا مصر تانى والجماعة بتاعتنا تنبسط منا قوى علشان إنت عارف ساويرس وما أدراك ما هو ساويرس وطبعا يا ريس إنت مش عايز شركا نصارى فى التجارة بتاعتنا
مرسى: طبعا بس برضه يا فالح الضرايب دى بأثر رجعى والقانون لو مفهوش زينب القاضى حا يرفض يجيب زينب فى الموضوع
قنديل: امال النائب العام قاعد يعمل أيه أهو يقيف لهم تهمة ونساومهم ولو دفعوا أهى مصلحة
مرسى: برضه الموضوع ده حا يحصل طائر النهضة وحا نرجع نغنى ظلموه
قنديل: طب شور علىّ وأنا فوريرة
مرسى : جبتك يا قنديل تعينى لقيتك يا قنديل عاوز إللى يولع فيك
قنديل: معلش يا ريس أهو كيرى جه وأكلناه جبنة كيرى وحا يجيب لنا القرض بتاع البنك الدولى وأهو نعدى أيامنا لغاية ما تخلص ولايتك
مرسى يعنى فكرك ما أقدمش على فترة تانية
قنديل: ما هو لو فضلت الظروف على كده أنا شايف إنك مش حا تكمل الأولانية
مرسى : غور من قدامى وما تورنيش وشك إلا وإنت عامل مشروع يطلع لى فلوس
قنديل: حاضر ياريس
مرسى: فينك يا مبارك كنا قاعدين فى الضل وعاملين فيها سباع وكنت إنت شايل الشيلة دى لولا الملامة كنت رجعتك رئيس تانى بس أنا عارف لو رجعت رئيس أنا حا أخش السجن تانى وأنا مش عاوز أتسجن تانى فأنا قاعد على قلبكم يا مصريين لغاية ما تطفشوا أو طائر النهضة يفقس ويطلع كتاكيت
0 comments:
إرسال تعليق