لقاء مع د. إياد قحوش بمناسبة إصدار مجلّة السايح الألكترونية

• شو هوّي الشعر ؟
- مافينا نحدّد الشعر .. كل مالبّسناه طقم بيكبر عليه وبيشقشقو

• شو الفرق بين اللغه الفصحى و اللغه المحكيّه ؟
- اللغه المحكيّه بتعربش معنا عالسجر و بتطلع عالجبال وبتسهر معنا بالشتويي
ومنشوفها مع الولاد عالبيادر ومع الفرحانين بالأعراس ومع المحزونين بالمقبره
أنا كل أحلامي باللغه المحكيّه
اللغه الفصحى بتعرّم عالورق

• شو الغايه من تأسيس مجلة السايح ؟
- الغلّه كبيره ومابيسوا نضلّ نضمّن الشعر باللغه المحكيّه لغيرنا

• من وين إجا اسم المجله ؟
- من السايح هالجبل الكبير ل بتشمّ ريحة السما من عندو و قاعد قعده عربيّه بنص وادينا

• مين معكون بالمجله ؟
- معنا غوّاصين كل ماشكّو ع سواحلنا بيرجعو بكمشة درر

• هل المجله بتقتصر عالشعر باللغه المحكيّه وعالزجل ؟
- شعر و زجل و و قصص و دراسات عن الشعر باللغه المحكيّه وعن الزجل وعن الشعرا

• شو بتحبّ تقول لشعرا اللغه الفصحى ؟
- بقللهم في حلاوه ببعلبك وبغير بعلبك
الشعر باللغه المحكيّه تثقف و دار بلدان .. ونحنا عم نعجقو بالصور وبالخيال وفتحنالو شبابيك عالفكر .
بشعرنا منحكي عن الخيال للي بينكسر , والصوت للي فيك تمسكو , والضو البتسمعو
نحنا فتنا عالموت وبحبشنا بخزانتو
مشينا بعكس الوقت
دوّرنا الأرض ع إصبع ولد زغير

• مينا نحنا ؟
- شلّه من الشعرا بيكتبو شعر اللغه المحكيّه والزجل داقو طعمة الملكوت وعم يحكو عنها

• أكيد في صعوبات قدامكن .
- طريق المجد دائما طلوع

• منلاحظ إنكون عطيتو لقب للمجله ت تكون للشعر باللغه المحكيّه وللزجل . يعني فصلتو شعر اللغه المحكيه عن الزجل .
- الزجل بابو وسيع ومرحباني وفي ع عتبتو نضوة فرس
الشعر بابو ديّق بس سقفو عالي .. وقلال بيفوتو من الباب الديّق
تيلاقو الملك

• ومين هوّي الملك ؟
- السرّ الكبير

• بمين تأثرت من الشعرا ؟
- بألله

• ليش الله شاعر؟
- الله هوّي الشاعر الأكبر .. هوي شاعر الشتي و الألوان و الوقت والحلم

• وشو أحلى قصيده لألله ؟
- القيامه

• بتآمن بالقيامه ؟
- القيامه حلم للناس ل بتصلي .. بس للشاعر الكبير القيامه ذكرى

• من أيمت بلّشت تكتب شعر؟
- من يوم المرق من حدّي الموت وجفّلني .. وبعدني جفلان

• وأيمت بتكتب ؟
- أنا ع طول عم أشعر ماعدا وقت البكون عم أكتب شعر

• كيف يعني ؟
- يعني الشاعر بتكون حواسو عم تعبّي طول الوقت
و وقت بيكتب بيفضّي من الخزّان

• شو عمل فيك الشعر ؟
- قدّسني

• بتحكي عن المحبّه كتير شو إلها علاقه المحبّه بالشعر ؟
- قللي صديقي الشاعر المشتاوي الكبير عصام يوسف .. وقت بتقول لحدا بحبّك كأنّك عم تقللو مارح تموت . المحبّه بتخلّد الشعر

• شو مهمتكم بهالمجلّه ؟
- إنو نعبّر خيط الروح بإبرة الكلمه

• وشو ناويين تعملو بالخيط ؟
- يانغزل طقس صافي تانقدر نشوف الملايكه الشفّافه يا نلفّو كبكوبه بلكي بتصير كوكب جديد

• ومين بتحب من الشعرا ؟
- بحبّهن كلّهن لأنو المحبّة الحقيقية بتطلع من القلب مابتنفرض من برّا

• كلمه أخيره
- بتشكّرك وبحب نوّه بجهود الأخوة جهاد ابراهيم و جورج حنا ( أبو اسبر) بإخراج مجلّة السايح وبشكر ضيعتي و وادينا يللي دايما بيشجعو الأعمال الثقافية الجميلة وبوجّه تحيّه لكل زملائي شعرا المجله من سوريا ولبنان.

------------------

من قصيدة ملاك النّار
وجْوانحو صحرا
كأنْها غيوم
صفرا
وقت بتقوم .. نص القيامه عالدني بتقوم
ولمّا بيرفّو بالفضا
بتفكّرو
واقف عم يهوّي على منقل نجوم

----------------

د. إياد قحوش

طبيب في علم المخبر ونقل الدم من جامعات أمريكا ويعمل في مستشفى الملكة إليزابيت في هاليفاكس و بروفيسور مساعد في جامعة دالهاوزي و مدير بنك الدم في مقاطعة نوفاسكوشيا في كندا .
نشأ وترعرع في مرمريتا . متأهل وله صبيان وبنت . يكتب الشعر باللغة المحكيّة ويعتبر من روّاد الشعرا للي أدخلو الفكر والفلسفه عالشعر المحكي وأسس مؤخرا مجلة السايح الألكترونية التي تصدر من موقع ضيعتنا مرمريتا

أجرى اللقاء لموقع ضيعتنا مرمريتا المغترب المرمريتاوي في كندا كميل عين الشايبة