ردد الصدي ف الفضا نداءات
كلمات
قالت ده عاشق
بين قلبه وبين حبيبه مسافات
وضايع ما بين العيون والعيون
غناوي الليل
ودقة الساعات
والسهد والآهات
ردد الصدي ف الفضا دقة قلب هربت
زي طير خارج حدود السرب شردت
ضاقت م الحنين
ودوبها الحنين
صرخت بعلو الصوت
فينك
يا عيونه المشتاقين!!!
فينك يا لمس الأنامل المحرومين .....
فين الأمان ف وجودك??
فين عهود قالت لو مرت بينا السنين
دايمن متجمعين .....
ردد الصدي ف الفضا دمع النايات
وصوت البلابل تغرد تسجل اللي فات
وتحيي الذكريات
وتقول للعاشقين
كنا فين
وبقينا فين
وسنين العمر اللي حبت
اللي عشقت
بقي بيننا وبينها سنين
ونغم ناي وكلمتين
وآهة مدفونه
ساكنه القلب والنني
ساعات تكون ضحكة مشروخه
وساعات تكون دمعتين
ردد الصدي ف الفضا صرخة جنين
كان راسم إنه يكون
ف الكون فارس عاشق
أو مجنون
كان أمله يمد الإيد
يجيب بكره البعيد
ويهتك ستر الظلام
ويحطم المستحيل
كان حلمه يكون فجرك
ويبقي ضيه م ضيك
يكون ف طريق خطوك قمر وناس
ويكون ف الوحده لو حس بيها قلبك
كل الناس .......
ردد صدي قلبي ف سما حبك كلام
وبعت لعيونك م روحي أعز سلام
ووصي النسيم والمطر
والبرد والاحلام
ما ينسي قلبك غرامي
ولا ف عيونك غير صورتي تنام
0 comments:
إرسال تعليق