+ عـشـان خـاطـرى يـامـا مـاتــبـكـيـــش
أنا عـايـش فالسما ولا انتى متعرفيـش!!
إن اللى بيستـشهد على إسـم ربـنـا
بـيـعـيـش ف أفــــراح مـاتـنـتـهـيـــش
+إحـنـا كـنـا شـايـفـيـن بعنـيـنا السمـا
ومنظر الـمـلايـكـة كان مطـمـن قـلـبنـا
ولا حـســيـنـا بــألـــم .. ولا عـــــذاب
وربنا جـهـز إكـلـيـل لكل واحـد مـنـنـا
+ عــــارف إن قـلـبـك قــايـــد نـــــــار
وحـاســة بـالــحــســرة والــمـــرار
خلى عـنـدك ايـمـان وثـقـة بـربـنــا
دة الـهـنـا عـادل ومُـنـتـقـم جــبــار
+ أوعى تفتكرى إن حـقـنـا هـيـضـيع
دا ربـنـا قـال لو نـسـيت الأم الـرضـيع
هـو مــش مـمـكـن أبــداً يــنــســانـا
والـــويــــل ليهم لأن غـضـبـه فـظـيــع
+ شوفتى المجرمين بسيوفهم وشرهم!
مـن جُـبـنـهـم كـانـو مـغـطــيـن وشــهـم
لـكـن ربـنـا كـان كـاشفهم وشـايــفــهــم
وكـشـف لـلـعـالـم حقدهم وسـواد قلبهم
+ إفـرحــى يــامــا وإرفـــعــى راســــك
واحـكـى حـكـايـتـى لكـل أهلك وناسك
قولى إبــنـى إسـتـشـهد وهو رافـع راسـه
ولآخـر لـحـظــة كـان شـجـاع ومُـتـمـاسـك
+ عارفة ياما لما كانت السيف على رقـبـتـى
شـوفـت إنـجـيـلـى وصـلـيـبـى وكـنـيــسـتـى
وكان نفسى آخدك فحضنى وأقولك يا حبيبتى
تعيشى يا اللى تـعـبـتـى وعـلـمتى وكـبــرتـى
+ بـس وحـيـاتى عـنـدك ياما مـاتـعـيـطـيــش
أنا مـامـوتـش .. دانا دلـوقـتـى اللى هـعـيـش
هـعـيـش فـالـســــمـا مـع الــشــهـدا الأبــرار
وســـط الأفــــراح الـلـى مــابـتـنــتــهـيـــش
الشاعرة ناهد فاروق شاروبيم
كلمات قويه جدا ومعبره ومعزيه لكل قلب موجوع ونفس حزينه
ردحذفربنا يعوض تعبك المستمر يا اعظم شاعرة